الأحد، 25 مايو 2008

أبليس يرحل مكتئبا !!





علي باب سفارة كندا ..
لمحت إبليس وف إيده إستمارة ..
بقول له علي فين ..
قاللي بص ..يا هجرة يا إعارة ..
يا عم زهقت كفرت ..ألاقيش معاك سيجارة ..
أنا انتهيت خلاص ..لا نافع وسواس ولا خناس ..
ولا ليا عيش وسط الناس ..دي عالم مجرمين ..
عندكو فائض ف الفساد في كل البلاد ..ومش محتاجين شياطين ..
مليش عيش ف البلد دي بقالي سنين عاطل ..وانتو بتعرفوا تقلبوا الحق باطل ..
وتمشوا ف جنازة القتيل ..وتسلكوا القاتل ..ومفيش مشاكل ..
ياعم ده أنا بقيت أوسوس بالمقلوب ..وأقول للحرامي كفاية بقي ..إنت مش هاتوب ..
يعني إنت هاتعمل كل الذنوب لوحدك ..
وأنا إبليس ..أشتغل واعظ ولا كمساري ف أتوبيس ..
ياعم ده أنا زمان ..كنت أستني حد ينسي يسمي وهو بياكل لقمته ..
دلوقتي كل أكلكم ملوث و بصراحة الواحد خايف علي صحته ..
ده مفيش ضمير أساسا ..عشان أموته ..وكل واحد بمزاجه ..خربانه ذمته ..
يا راجل ده من كتر ما لطشت معايا ..خرجت ف مظاهرة ..مع الناس اللي بتقول كفايه
********
و.....صباح الخير يا مصر
*********
منقول ............ للأمانة

20 التعليقات:

Ahmed Kamal يقول...

غريبة قوي ، أنا كنت فاكره في الحزب ..

صباح الخير يا مصر يقول...

أحمد كمال
*********
هو فعلا كان فى الحزب...بس تخيل ان ضميره صحى من اللى شافه
اسعدنى مرورك
تحياتى

بنوتة يقول...

الي صباح الخير يا مصر و لابليث الخبيث
________________________________
1_زي ما الاستاذ خبيث قال ان ..كنت أستني حد ينسي يسمي وهو بياكل لقمته لكن دلوقتي في ناس تقول يلا هو احنا وخدين منها ايه ؟؟؟؟
2_انا عندي تعليق صغير على حاجة قلها ابليس :أنا انتهيت خلاص ..لا نافع وسواس ولا خناس ..ليه يعني هو خلاص ما بقاش في حد مؤمن كل الناس شايفهم فاسدين
3-في ناس مؤمنين بس لو دورت عليهم
__________________________________
خارج التعليق
______________
الدنيا مش وحشة زي ما كل الناس شايفيين و مصدقين لا حنلاقيها حلوة لو نظمناها و دققنا في كل حاجة فيها
________________________________
تحياتي و ارجو الابتسام للحياة
و زيارة مدونتي و الرد على اخر سؤال في البوست و شكرا
________________________________

mostafa rayan يقول...

عندك حق في بلدنادي حتي ابليس ممكن يتوب
في بلدنا شياطين الأنس فاقوا شياطين الجن جنبهم ملايكة اصلا
تحياتي ليك

خمسة فضفضة يقول...

السلام عليكم ورحمة الله وبركاته

لما يكون ابليس ناوي يهج من البلد وماعدش طايق
يبقي الله يكون في عون الناس الغلابه اللي مش لاقيه العيش الحاف ولا حتي لاقيه تمن تذكرة الاتوبيس مش تذكرة الطياره اللي هاتهج بيها


سلام

صباح الخير يا مصر يقول...

mostafarayan
*************
اسعدنى مرورك
تحياتى

صباح الخير يا مصر يقول...

بنوته
*********
اسعدنى مروك و دعوتك للتفاؤل و رؤيه الجزء الملئ من الكوب
تحياتى

صباح الخير يا مصر يقول...

خمسة فضفضة
*********
اسعدنى مرورك...و أعجبنى البوست بتاع حضرتك و خاصة موضوع شراء دوا الشرب بالمعلقه...عند حضرتك حق(يبقي الله يكون في عون الناس الغلابه اللي مش لاقيه العيش الحاف ولا حتي لاقيه تمن تذكرة الاتوبيس مش تذكرة الطياره اللي هاتهج بيها )
تحياتى

rtrcbh يقول...

السلام عليكم ورحمه الله وبركاته
وفقكم الله اخانا على النقل وجزيتم خيرا على الامانه فى ذكر انه منقول
هقول ايه
هقول كلمات المسهنس خيرت الشاطر الذى كان ضمن المحاكمات العسكرية حين قال
مش هنسكت
مش هنسافر
مش هنسيب
وفقنا الله واياكم الى كل مايحبه ويرضاه

استراحة محمد يقول...

الحاجة الوحيدة اللى مديقانى فى حكاية رحيل ابليس دى
انى مش هلاقى حد ارمى بلايا عليه بعد كده
تحياتى ونورتنى فى استراحتى

blackcairorose يقول...

أحببت أمر والقى التحية والتهنئة بالمدونة

Desert cat يقول...

انا شوفتها قبل كدا بس هى فعلا جامده جدل

صباح الخير يا مصر يقول...

/أبويحيى وادم
***************
جاءنى الموضوع على بريدى و أعجبت بفكرته و خصوصا اننا وصلنا لمرحله من الفساد تزهق ابليس نفسه فرأيت ان يقرؤه الجميع
اسعدنى مرورك

صباح الخير يا مصر يقول...

استراحة محمد
**********
هو مارحلش الا لما اكتشف ان كل اللى حوله بقوا اباليس وتفوقوا عليه فلا تقلق ممكن ترمى بلاك اباليس الانس الموجوديين
شرفتنى

صباح الخير يا مصر يقول...

blackcairorose
*******************
ميرسى يافندم كلك ذوق
نورتينى

صباح الخير يا مصر يقول...

Desert cat
************
جاءنى الموضوع على بريدى و أعجبت بفكرته و خصوصا اننا وصلنا لمرحله من الفساد تزهق ابليس نفسه فرأيت ان يقرؤه الجميع
اسعدنى مرورك

غير معرف يقول...

تحياتى لمدونتك الجميلة وأمنياتى بمزيد من الإبداع .

فاتيما يقول...

يا صباح الخير يا مصر
عاوزة اشكرك لأنى بدور على القصيدة دى بقالى كتير و موش لاقيها
كتر الف خيرك
و هيا للشاعر على سلامة
جراح المشاعر بتاع زماننا الحالى
أشكرك عليها
و تحياتى

صباح الخير يا مصر يقول...

ايهاب رضوان
***********
شكرا على ذوقك

نورتنى و انشاء الله هاجى اشرب القهوه عندك

تحياتى

صباح الخير يا مصر يقول...

فاتيما
***********
ياصباح الخيرات...ازيك يا فاتيما يارب تكونى بخير
انا لو اعرف كنت افتتحت المدونه
بالبوست ده
:)))
نورتينى